Ховд аймаг дахь шүүхийн Тамгын газраас зохион байгуулж, Аймгийн Гэмт хэргээс урьдчилан сэргийлэх ажлыг зохицуулах салбар зөвлөл, Аймгийн шүүх, Прокурорын газар, Цагдаагийн газраас хамтран, Ховд аймгийн нийт сумдын Гэмт хэргээс урьдчилан сэргийлэх ажлыг зохицуулах сумдын зөвлөлийн дарга, гишүүд болон “Хууль, шүүхийн үйл ажиллагааг сурталчлах сумын багийн гишүүд, төрийн албан хаагчдад зориулсан “Эрх зүйн тусгайлсан мэдлэг олгох сургалт”-ын хөтөлбөрийг батлагдсан хуваарийн дагуу Цахим хэлбэрээр зохион байгуулж байгаа ба өнөөдөр 2 дахь удаагийн /2021.04.20/ цахим сургалтыг зохион байгууллаа.
Сургалтын өмнө Ховд аймаг дахь Цагдаагийн газрын дарга, цагдаагийн хурандаа Э.Даваасүрэн нээж үг хэлж, 2020 оны Гэмт хэрэг зөрчлийн нөхцөл байдал, анхаарах асуудлын талаар мэдээлэл хийсэн бөгөөд Ховд аймаг дахь Цагдаагийн газрын Гэр бүлийн хүчирхийллийн асуудал хариуцсан ахлах мэргэжилтэн, цагдаагийн хошууч Ж.Оронбасар “Гэр бүлийн хүчирхийлэлтэй тэмцэх тухай” сэдвээр сургалт явуулж, уг сургалтад нийт 17 сумын 91 удирдах болон гүйцэтгэх төрийн албан хаагчид оролцлоо.
Гэр бүлийн хүчирхийлэл гэж юу вэ? Хүүхдийн эсрэг хүчирхийллийг хэрхэн илрүүлж, мэдээлэх вэ? Гэр бүлийн хүчирхийлэл үйлдэгчид хүлээлгэх хариуцлага зэрэг дэд сэдвээр сургалтыг зохион байгуулсан бөгөөд сургалтын төгсгөлд сумдын гэр бүлийн хүчирхийлэлээр шийтгүүлсэн этгээдийн тоон мэдээлэл болон гэмт хэрэг, зөрчлөөс хэрхэн урьдчилан сэргийлэх талаар мэдээлэл өглөө.
